Zum Underschid vum Bärgchääs wird dr Alpchääs nur im Summer diräkt i dä Alpbetriibä härgschtellt. Diä frisch Rohmilch wird siiferli verchääset und de vor Ort glaageret und pflägt.

Käi Alpchääs schmeckt wiä dr ander. Ertlich underschidlichi Chriter, Härschtelligsmethodä und Tradizionä zäichnet dr jewiilig Chääs üs im Bezug uf ds Aroma, d Farb, d Form, dr Riifigrad und d Herti. I äim Punkt schtimmet aber alli Alpchääs uberi: im äinzigartig wirzigä Gschmack, wo vu dä frischä Alpächriterä härchunnt. Uf dä Alpwäidä wachset nämli mängisch wit uber hundert verschitnigi Chriter und Greser – uf dä Mattä im Tal unnä sind äs normalerwiis nur eppä grad äs Dutzed.

Bim Ürner Alpchääs hantlet äs sich mäischtens um nä vollfettä Halbhertchääs, wo je nach Riifig iberüs mild bis chreftig-wirzig schmeckä tüät. Fir dr Ürner Alpchääs z machä, wird d Abedmilch, wo uber d Nacht üs glaageret und gchiält wordä isch, mit dr frischä Morgedmilch zämägläärt. Ä fertigä Chääs bringt zwischet sächs und acht Kilo uf d Waag. Mängisch tiänt d Älpler fir verschitnigi Aromä z brcho äü eppä Chnoplech, Schnittläüch, Chimi, Basilikum oder Pfäffer i Alpchääs dri.